Technical bench ya Malkia Strikers itanyite kugweta provisional squad muthenya wa njumaviri niundu wa timu ya kivururi ya atumia muthakori wa Volleyball na iria igakorwa ikivariria niundu wa macindano ma Africa Cup of Nations undumwe na gucaria mweke mbitikari cia 2024 Paris Olympic Games.
Timu ino ya athaki 21 ikanirirua ni coach munene Paul Bitok vamwe na coach kuuma vururiri wa Brazil Luizomar de Moura na team manager Roberto “Beto” Opice Neto varia mageka uguo vuva ya mithako ya Kenya Volleyball Federation National League kuria Nyayo.
Bitok niugite kwiina athaki engi anini na aria mathakire wega muno kuria Tunisia varia amwe ao magakorwa mari thiini wa provisional squad. Akiongorera marenda kumaviriria niundu wa macindano manene maria mari mbere yaao.
Timu ino ikanyivua nginyagia athaki 16 mbere ya mathiite Morocco kuria magekara ciumia igiri na macoke kuthii International Volleyball Federation (FIVB) Challenger Cup iria igekika mweri muku kuuma tariki 25-31 kuria France.
Kuuma vau, timu ino ikathii kambi kuria Anoraks, France mbere ya mathiite Cameroon niundu wa mbitika cia Cup of Nations kuuma tariki 18-30 mweri wa kanana kuria Yaoundé.
Kaari wa Mugendi
Mbica irutitue online
