Ruvonge rwa kurumbuiyia andiki a movoro nirukumite ntharikiro iria irekikire muthenya
wegoro yerekeretue kuri andiki a movoro athatu aria marathiite kuugania movoro megii
muvango wa ugitiri uria uratwatithagua nambere kuria Matungulu kaunti ya Machakos.
Athatu acio Mike Ndunda wa Kamba Tv, Richard Muasya wa Athiani Fm na Boniface Mutisya
wa Mutongoi Tv maretitue ni civu wa Katine Francis Mulinge niguo mavote kuugania movoro
vindi ya muvango ucio riria maratharikirue ni mbeumbithi.
Murugamiriri munene na mwandiki wa kanju ya andiki a movoro David Omwoyo Omwoyo niuririkanitie mwingi wiathi wa andiki a movoro ni undu wa vata muno niundu andiki a movoro
nimamenyithia mwingi maundu maria marekika. Guku akiongorera andiki a movoro
nimavatarite kuruta wira waao matari na gwoya wa kutharikirwa kana kunyamarua.
Wauguo niuritie maavithaa a ugitiri kuthuthuria gicanjama giki na gutigirira aria maragerire
ngero ino nimocerwa makinyo ma watho. Ntharikiro kuri andiki a movoro akiuga ni mugaru
na ivoto ciao niundu nimagitiritue rungu rwa watho na katiba undumwe na Media Council
Act, 2013.
Omwoyo niuritie aria mangikorwa mavitiritue ni andiki a movoro kuvura rivoti kuri kanju ino na
iria iina mavinya kiwatho kuramata maundu monthe makonie andiki a movoro nwati ti guoca watho njarari ciao.
Kaari wa Mugendi
Mbica irutitue online
