Arimi a manjani kaunti ya Embu, nimataritwe matigekire manjani mao fertilizer niundu wa mbura nene iria irathii na mbere kwona nigukorwa igikuwiwaa ni manji na vanduri va uguo materere mbura inyivanyive, niguo fertilizer ino ikorwe ina uguni kuri manjani mao.
Ritana riri rirutitwe ni mwenegiti wa ruvonge rwa manjani niruo KTDA Enos Njeru, ari kuria kithiiri kia manjani kia mungania .
Kavindari wakau Njeru augite marerigirira fertilizer iyo ingi nigukorwa igikinya guku vuriri tariki 10 mweri tuthiite, na kuria augite wona yakinya nimagutigirira niyakinyira arimi araka ta uria kungivotekeka nwati akauga angikorwa mbura ya EL Nino nwaikuthii na mbere kura matikorwa makimenenganira.
Kunari uguo Njeru augite nimarerigirira thogora wa fertilizer niukugwa wana makiria kwambiriria mwaka tuthiite niguo murimi akorwe akigunika makiria kumana na urimi wake.
-Mugambi wa Njeru-
-Mbica ciumite online-
