Minista wa ruvonge rwa wathani na uramati thirikariri ya kaunti ya Embu Emilio Kathuri augite, thirikari ya Embu niivete Matereva aria marecokirie gicukirori kia Embu muthenya wegoro, ciumia igiri cia kuthukuma kamwerwa mwaki kana contractor muceru acokete gicukirori kiu kumiririkiria.
Akiaria na njira ya mwanya na kameme ga Kimuri F.M Kathuri augite wanagukorwa matereva mau nimarecokirie matari na rutha, thirikari ya kaunti ya Embu niiyaraniritie nao umunthi na gwitikaniria kavinda karia magukorwa magikuanira gicukirori kiu.
Akithie na mbere, Kathuri niwariritie andu aria mathiururukagia indo thokori iyo makiendagia na kuuga maundu mao nimararorwa ni ruvonge rwa kuramata wonjoria na ruria rurungamiriritwe ni ni minista wa wonjoria kaunti ya Embu Jamal Runyenje ruria ruramataga maundu ma wonjoria.
Mwenari wake, mwenegiti wa muungano wa ene matatu kauntiri ya Embu Robinson Munyi nake augite nimaraniritie na matereva na gwitikaniria kavinda karia mavetwe kathira nimakauma gicukirori kiu, niguo gwitikiria mwaki ucio kurirkiriria gwaka gicukiro kiu kia ngari.
Maundu mama maukite muthenya umwe tu vuva wa matereva mau gwicokia na kuuga nimakuthie na mbere na kuthukuma niguo mavot kuthondeka mbeca mbega na muno kavindari gaka thiguku ikuviririe.
-Murugi Ndwiga-
-Mbica irutitwe online-
