Muthikavu munene wa arch Diocese ya Nyeri uria nwake muthikavu murungamiriri Diocese ya Embu, Anthony Muheria niuritie Mavatiri vamwe na Masista kuthie na mbere kuvoanira undumwe na kuvoera uria wari muthikavu wa Diocese ya Embu Paul Kariuki na uria kavindari gaka ni muthikavu a Diocese ya Wote guku akiuga mavoya mao nimagutethereria muthikavu ucio gukuria Diocese ya Wote.
Akiaria umunthi vindi ya kiathi kia gukunguira thiguku thiini wa mekaro ma muthikavu na varia Mavatiri, Masista, Maseminarian undumwe na aria marathomera usista, macemanitie, Muheria augite riria andu makuvoanira nimavotaga gukura na makagia vinya mwiganu wa kuthie na mbere na maritana mao.
Mwenari wake, Vicar General, Eliud Wanyoike augite kiathi kiu nigitethereretie Masista na Mavatiri undumwe na Maseminarian na aria mathomagira usista guka vamwe guku agicokeria ngatho Mavatiri, Masista, Maseminarian na aaria marathomera Usista niundu wa gwitikira kuthie kiathiri kiu.
Wauguo, Wanyoike augite urumwe gatagati kao niumatagua riria mauka vamwe, kwaraniria, kuricanira vamwe na gukenanira.
Mwenari wao, Mavatiri, Masista vamwe na Maseminarian aria maritie nimonanitie gikeno kiao niundu wa kuthondekerwa kiathi kiu guku magicokeria ngatho muthikavu murungamiriri wa Diocese ya Embu Anthony Muheria, niundu wa kuvaririria kiathi kiu.
-Murugi Ndwiga-
