Mwene kiganda gia gwicuria ngasi mwena wa Embakasi na kiria kirigite gututhuka mwaki na kuraga makiria ma andu ikumi na gutiga andu 300 mari na ndivangio njuku riu niurekereretue na bail ya ciringi ngiri 500,000 mbeca vari vari.
Derrick Kimathi, uria ni mwene kiganda kiria gicikene ta Maxxis Energy Nairobi Limited, arekereretue umunthi ni mucirithania munene Dolphina Alego na bail iyo kana mbondi ya ciringi mirioni 2.
Thiini wa ciira iyo, mwena wa nthitango niwavoete igoti kuongererwa mithenya makiria niguo ukorue urikitie uthuthuria wake nwati igoti rikirega.
Wavo igoti niriritwe ati mwena wa nthitango niwonganitie uira wa andu 363 na varia engi a aira acio mavutitue ni mutino ucio imwe kwa imwe guku mwena ucio ukiuga niwanyitite fomu cia P3 kuuma kuri maavitha a vorithi na varia ugite niwetererete uira wa andu engi 30 niguo kuthiria uthuthuria wao.
Akivecana wamuri wake, mucirithania Kimathi augite wanagukorwa mutino ucio niwacungirire ikuo cia andu engi na gutiga engi na ndivangio njuku uria ni mugaru na gicunji kia 203 na 204 kia mawatho ma gativa megie uragani kana Penal code, maavitha a uthuthuria wa wiki naai nimocete ciira iyo na nwamarathie na mbere na uthuthuria waao guku akiuga ciira iyo niigwoca mithenya mingi niundu wa namba nene ya aira, undu uria augite niguo ucungiririte kurekererua kwa mwene kiganda kiu.
-Murugi Ndwiga-
Mbica irutitwe online
