Njanji wa igoti inene Isaac Lenaola niuthuritwe atakuvingwa aita munini wa rais thiini wa igoti ria Residual Special Court for Sierra Leone.
Ruvonge rwa ucirithania thiini wa ndumiriri yaruo nimaugite njanji Lenaola athuritwe atakuvingwa thiini wa gikaro kiria gikikite kuria Freetown, Sierra Leone.
Njanji uyu niwathuritwe thiini wa igoti riri mwaka wa 2013 ni uria wari mwandiki munene wa muugano wa kimavururi, Ban Ki Moon, na agakorwa ari munini wa njanji Richard Lussick wa Samoa na uria uthuritwe gutungata ari rais vanduri va miaka iiri.
Umenyo na wirutiri wa njanji Lenaola ukamutethereria vanene gutungata thiini wa giturwa giki, ino ni kuringana na ruvonge rwa ucirithania.
Igoti riri ria Residual Special Court for Sierra ni ria kavinda na riocete mweke wa igoti ria mwanya ria Sierra Leone kana Special Court for Sierra Leone.
Wira wa igoti riri ni kugitira aira na kumanyita mbaru, gutethereria nvonge cia kivururi iria iramataga nthitango cia mwingi undumwe na kumurika matua maria mavecanitwe ma njera, aria moveretwe na marekereretue mbere ya kuthiria kiovo ta uria gwikikire ciirari ya uria wari rais wa Liberia, Charles Taylor.
-Kaari Mugendi-
Mbica irutitwe online
