Captain wa timu ya vururi muthakori wa Volleyball mwena wa atumia, Mercy Moim niuracakaya gikuu kia muthuri wake, Joseph Asuza uria urakuirire mutinori mucuku wa varavara.
Mutino ucio uronekanire varavarari nene ya Thika muciiri wa Nairobi, vakuvi na thivitari ya Mathari.
Agikira mukonde ndeto ino, mwandiki kiamari kia muthako wa volleyball guku vururiri, Ismael Chege niugite kiama gikarugama na muthaki uyu wii gatu kavindari gaka karito.
Wauguo niuvoete athaki onthe a muthako wa Volleyball kunyita mbaru Moim na kumuvoera kavinda gaka karito.
Kavindari gaka Moim ari vururiri wa Ghana na timu ya Malkia Strikers niundu wa macindano ma All African Games nwati atanyitwe gucoka na mucii umunthi kivwai kana ruciu niundu wa ndeto ino.
Ndeto makiria ciugite mutino ucio uraumire thaa mugwanja na nuthu cia utuku varia Asuza aragiire ngurario nyiingi. Asuza arakuirire thivitariri ya Guru Nanak akiamukira utungata wa urigiti.
Mwiri wake wetererete gwikirwa kithimi kia postmortem.
Kaari Mugendi
Mbica irutitwe online
