Mithako ya cukuru cia mucingi na Junior, zone ya Kathangariri niithire nambere wa wega kuringana na uria mitaratara iravangitwe cukururi ya mucingi ya Muvandori mwena wa Kathangariri.
Akiaria na kameme ga Kimuri Fm na njira ya mwanya mwenegiti wa Kepsa, kaunti nini ya Embu yeguru, Gachie Njagi niucokeretie ngatho ciana iria cionthe irekinyitie mithakori ino guku akigathiriria Zone ya Kathangariri niundu wa kuthii nambere kuandikithia uvotani.
Mwenari wake mwenegiti wa mithako zone ya Kathangariri na uria nwake mwarimu munene wa cukuru ya mucingi ya Ndunda, Salesio Kamau niugite mithako ino irari na ucindani munene. Niucokeretie ngatho rais William Ruto na minista wa kithomo Ezekiel Machogu ngatho niundu wa uria mamanyitiririte mwena wigii kithomo.
Wauguo aciari nimataritwe gukorwa mari muvariri wambere kunyitirira iveo cia ciana ciao.
Mithako ino irari na cukuru 16. Cukuru cia mucingi, gikundi kia Nthambana nigiocete namba yambere iina marks 228, Gichangae yocete namba igiri nayo namba ithatu igiocwa ni Kithiga. Cukururi cia Junior Nthambana nwayo ivotanite, Kithiga yocete namba igiri nayo Gichangae igioca namba ithatu.
Kiumia turoretie tariki 26 avotani nimagakorwa makithii thiini wa gikiro kia Sub County varia makathondeka timu ingi na iria ikathii kurugamirira kaunti nini ya Embu yeguru gikirori gia kaunti kuria Kigari. Kuuma gikiro kia kaunti makathii Regionals kuria Meru na varia mithako ikathakirwa Chuka.
Avotani a cukuru cia mucingi makithii Nyeri Moi Complex naao aria a Junior makithii gucindanira Machakos.
Kaari Mugendi
