Aria matumagira thitima nimagukorwa magikenera kunyivua kwa marivi ma thitima na gicunji kia 13.7 vari igana muthia wa mweri uyu varia ndeto ino yumanite na kuongererwa vinya gwa ciringi ya Kenya na kunyivua kwa thogora wa maguta maria matumikaga kuthondeka thitima.
Marivi ma maguta na kunyivua kwa ucenjania wa mbeca cia nja na iria ithondekete gicunji kinene kia watho wa thitima nicianyivirue na gicunji kia 37.3 vari igana mweriri wa kathatu na kana mwakari uyu wa 2024 ikirori cionthe cia aria matumagira thitima ta uria yacavithirue ni ruvonge rwa kuramata thogora wa maguta guku vururiri.
Marivi niundu wa maguta manviyivirue kuuma ciringi 4.64 mweri wa kathatu mwakari nginyagia 3.26 mweri wa kana ikiringithanua na mweri wa January riria yari na ciringi 4.94.
Wauguo ucenjania wa mbeca niwanyivirue kuuma ciringi 3.68 mweriri wa kathatu nginyagia 1.96 mweri wa kana ikiringithanua na mweri wa January riria yari na ciringi 6.85.
Kuringana na murugamiriri munene wa kambuni ya utambia wa thitima, Dr Eng Joseph Siror niugite mundu utumagira units inyivirite kana 30 vari mweri akariva ciringi 629 ikiringithanua na mweri muvituku riria marivi mari ciringi 729 varivi marivi mama manyivite na gicunji kia 13.7.
Aria matumagira units 60 cia thitima makariva 1,574 ikiringithanua na mweri wa kathatu varia marivire 1,773, marivi mama makinyiva na gicunji kia 11.2 vari igana.
Naao aria matumagira units 120 cia thitima vari mweri makariva ciringi 3,728 ikiringithanua na mweri wa kathatu mwakari varia marivire 4,127, marivi mama makinyivua na gicunji kia 9.7 vari igana.
Kaari Mugendi
Mbica irutitwe online
