Varavara ithatu mwena wa Nairobi niivingitue gwa kavinda na ngari ciavewa mwerekera gutumira varavara ciingi vuva wa kugumirwa ni mwicuro wa manji kurumirira mbura nene iria iraurire muthenya wegro utuku.
Ruvonge rwa Kenya Ubarn roads Authoruty (KURA) rwaniririte varavara cia Eastern Bypass na Thika Bypass ni ivingiriritue atwarithia a ngari na maavithaa vorithi ni marerekeria ngari uria kwagirire.
Video ingi iria ikoretwe igitambua nendari cia ukinyaniria yonanitie varavara nene ya mbagathi icurite manji nginya mwena wa T Mall Junction na kumitiga itangivitukitika ni atwarithia a ngari guku nakuo varavara nene ya Thika gukorwa itangivitukirika vakuvi na cukuru wa Kenyatta University na gutiga aria mavuthagira varavara iyo matakumenya wa gwika gwa kavinda ka mathaa kumana na mbura nene iria ithiite nambere kundu gutiganite.
Kwingi nakuo andu 6 ni mavonoketue ni maavitha a mutharava mutune mwena wa Kitengela vuva wa nyomba ciao kugumirwa ni mwicuro wa manji vuva wa rui ruria rukaga vindi ya mbura mwena ucio kuna nthingo ciaruo.
Mbica irutitwo online
–Murugi wa Gitonga-
