Avotani a ligi ya vururi, Gor Mahia nimakarivithitwe gucindana macindanori ma Coal City International Cup kuria Enugu, Nigeria kuuma tariki imwe mweri wa kanana mwaka uyu wa 2024.
Mwenegiti wa K’Ogalo, Ambrose Rachier niugite mechi ino igakorwa ii njira mbega ya kwivariria mbere ya macindano ma CAF Champions League kimera tuuthite.
Gor Mahia ikarivithitwe vuva ya gucinda nthumbi ya 21 ya ligi ya vururi varia macindire Muhoroni Youth na bao ithatu kwa noti na kwigatira tigiti ya kuthaka mbitikari cia CAF Champions League.
Macindano mama na maria mavariritwe ni thirikari ya gicigo kia Enugu maina timu inyanya iria ikathaka.
Rachier niuthite nambere kuuga macindano mama mari na uteithio munene wa kimbeca kuri timu ya Gor niundu wa mechi makathaka makamukagira ciringi itanyivirite ngiri magana 650 utagutara iveo ciingi iria makagia.
Wauguo Rachier niugite Gor niracarania na coach wiingi muceru niundu kandarathi ya Jonathan McKinstry ikathira muthia wa kimera giki.
Akiongorera kandarathi ya McKinstry ikathira mweri wa kanana nwati kiravu nikigucanirite nake kumurekereria mweri wa gatandatu niguo avote kuthii gutungata aita coach wa timu ya vururi wa Gambia muvirari wa maguru.
Gor iina mechi ithatu iria itagiritie kuthaka kimera giki; magacemania na Sofapaka tariki 16 mweri wa gatandatu, macoke matutane na FC Talanta mithenya ithatu vuvari na marikiririe kimera na Bidco United tariki 23.
Kaari Mugendi
Mbica irutitwe online
