Mbunge ya kaunti ya Bomet muthenya wegoro niiraikirie kura na gwitikania gwikia nja maminista athatu aria makuruvanitue na wagarari wa gativa, utumiri mucuku wa ovici na wagi wa wigiririki urutiri wira waao.
Athatu acio ni; minista wa kigina, ukinyaniria wa kiriu na maundu megii utonga wa kaunti Andrew Sigei, minista wa varavara, ukui na mawira ma mwingi Eric Kipkoech Ngetich na minista wa wathani, motungata ma mwingi na mirandi ya mwanya ndagitari Joseph Kipngetich Kirui.
Kamiti ya kuthuthuria nthitango ino niirathondekirwe.
Amemba 29 kuuma kuri 38 a mbunge ino ya Bomet nimaranyitire mbaru mendekithia maria maravecanirwe megii minista Sigei uria uronekanire na mavitia ma kuagaragara gativa na wagi wa wigiririki urutiri wira wake. Ndereti igii kuthengutua gwake iraretirwe ni MCA wa Kimulot Eric Kirui.
Wauguo amemba acio 29 kuuma kuri 38 nimaretikanirie na gwikua nja gwa minista wa varavara Eric Kipkoech Ngetich na uria uronekanire aina mavitia ma kuagaragara gativa na utumiri mucuku wa ovici. Ndereti igii kuthengutua gwake iraretirwe ni MCA Josphat Kipkirui.
Waringi amemba acio 29 kuuma kuri 38 a mbunge ino ya Bomet nimaretikanirie na gwikua nja gwa minista Joseph Kipngetich Kirui na uria uronekanire aina mavitia ma kuagarara gativa, utumiri mucuku wa ovici na wagi wa wigiririki urutiri wira wake. MCA wa kithukio, Vincent Mutai nike uraretire ndereti ino ya gwikua nja kwa minista ucio.
Athatu acio matinekinyia thiini wa gikaro giki varia mararugamirwe ni wakiri waao, Desmond Leteipa.
Kaari Mugendi
Mbica irutitwe online
