Ni rita ria mugwanja uria unyitiririte giturwa kia munene wa maavitha a vorithi Gilbert Masengeli aremetwe ni gwikinyia igotiri vuva wa kwamurithua uguo, niguo kutheria ndeto cigii kunyitwa mugwate kwa anduarume athatu mwena wa kitengela .
Aria maramurugamirira merite igoti Masengeli nimunyitikanu na wira kuria kauntiri ya Wajir na ndangivota gukorwa agikinyia niguo kuthuthurua .
Kurega gwikinyia kwa munene uyu wa vorithi gukite wanavuva wa gukorwa akiongererwa kavida vuva wa kwirikana ringi ni munyitikanu .
Mwena wa nthitango kuvitukira wakiri Nelson Havi nimauritie ni nginya rii igoti rigukorwa rigitikirie Masengeli gukorwa akirega gwikinyia igotiri.
Wakili Havi wauguo niugite niundu wa mavitia make ma gukorwa akirega kwathikira igoti avatie gukorwa akirutwa oviciri .
Masengeli arerigirirwa igotiri niguo gukorwa akiereithia uvoro wigii andu athatu na aria ni Jamil Longton na muruanyina Aslam Longton na muteteri wa ivoto Bob Njagi aria merikanire kunyitwa migwate ni andu aria mekuagirwa gukorwa mari maavitha a vorithi tariki 19 mweri wa kanana mwakari uyu kavidari ka mirurungano iria yatavanagua ni mbeu mbithi na aria menanagia ta GENZ.
