Amurua ngina airi na muvuraniri wa ivoto cia umundu na aria maurire kuuma tariki 19 mweri wa kanana mwaka uyu wa 2024 kurumirira mirurungano ya kuregana na thirikari Kitengela, nimonekanite mari muoyo kauntiri ya Kiambu.
Kuringana na Rais wa kiama kia mawakiri guku vururiri Faith Odhiambo, amuruangina acio airi Jamil na Aslay Longton maronekanire matetwe kuria Gachie, kaunti ya Kiambu.
Akithii nambere gutariria niugite aramenyithirue airi acio gukorwa matetwe muvakari wa Gachie na Nairobi ni aria maramanyitite migwate. Akiongorera mavoya na makinyo maria mocetwe nimatethetie guku agicokia ngatho niundu matirari ugwatiri.
Thiini wa mukwaa wa video uria urarekererue thiini wa mutambo wa ukinyaniria wa kiriu nimatariritie maundu maria mavitukirue guku magicokeria akenya ngatho niundu wa kumanyita mbaru. Guku makiongorera miario yaao onthe igekikaga kuvitukira Rais wa LSK.
Kavindari wakau, muvuraniri wa ivoto cia umundu Bob Njagi niuronekanire ari muoyo kuria Tigoni, kaunti ya Kiambu. Ithe Longman Njagi akiaria na kameme kamwe ga guku vururiri niuragire muvici ari thayu.
Akiongorera aravurirwe ni maavithaa a vorithi kuuma station ya vorithi ya Tigoni na kumenyithua muvici niuronekanite ari muoyo. Niuthiite nambere kuuga Njagi aragiririrwe ni muruangina guku akiongorera nimaracokia ngatho kuri Ngai niundu makoretwe makivoya amacokere ari muoyo.
Ndeto ino iraumire mathaa manini vuva ya Douglas Kanja gutuiwa munene wa maavithaa a vorithi na varia akanyiriritie athatu acio matiranyititwe ni maavithaa a vorithi.
Mbica irutitwo online
–Kaari wa Mugendi-
