Amemba a mbunge ya vururi nimaviririe kuvira ndereti ya kuruta munini wa mutongoria wa vururi Rigathi Gachagua kiroko kia umunthi kuria mbunge ya kivururi.
Mutongoria wa aria engi mbungeri ya kivururi na mubunge wa kikuyu Kimani Ichungwa niakirite kirore ati ndereti ya kuteng’ura Gachagua Wathaniri nigikuvirwa methari ya mbunge.
Nigua kuvira ndereti ino, nikurendeka abunge 233 mavure kirore guku rivoti ikiuga abunge 302 niarikiu gwikira muvuri.
Aria maramumenereria marauga Gachagua nimuthiu mugaro na gicunji gia ikumi ya katiba makiuga miario yako niyakuinda ngaukano na kumenaniithia nduriri cia Kenya.
Wavau niaramenererua guthii mugaro na icunji cia147, 148, 174, 186 na 189 iria irariria mitugo yake na mawira make ta mutethereria wa mutongoria wa vururi.
Niagukurwa agiteterera kumana na kuthii mugaro na watho na kugia utonga na njira ya ungumania agitumira mbeca cia mwingi. Utonga uyu uratuikika gukurwa uri kauntiri cia Nyeri, Nairovi na Kilifi.
Ndereti ino ya vituka, Spika wa Mbunge ya vururi Moses Wetangula avatie kutangaza maumirira kwi Spika wa Senate Amason Kingi vai mithenya iri niguo kuvangwa njira ya na mbere.
Mbica irutitwo online
–Perpetual Mwende-
