Gicigo kia kuiga nyamu cia kithaka kia Mwea Game Reserve wadiri ya Makima kauntiri ya Embu kiina uvotekeku munene wa kuguciriria atarii niundu wa nyamu itiganite iria ii gicigori giki.
Gicigo giki kiina ndwiga, ngiri na njogu gatagatiri ka nyamu ciingi iria ikaguciriria atarii kuuma guku vururiri na nja ya vururi.
Wongerereku wa njogu ukithii nambere kwambatira na gucungirira ngucanio gatagatiri ka andu na nyamu ino cia kithaka miena ya KENGEN, Gitaru na matura maria marigiciritie, ruvonge rwa ugendi na nyamu cia kithaka maina gwataniro na thirikari ya kaunti ya Embu nimambiriritie muvango wa kuthamithia njogu 50 kuuma Mwea Game Reserve kuthii Aberdare National Park, ita ya gutigirira kwiina wigananu wa kuvonokia nyamu ino na kumenyerera mwingi.
Wauguo minista Rebecca Miano niwiranirite gwikirira mitaratara ya gutethereria kaunti ya Embu gukorwa iri muvariri wambere maunduri megii ugendi na gutigirira njira ingi ya kuingira Mt Kenya kuvitukira mutitu wa Irangi niyathondekwa nevenya.
Mivango niithite nambere ya kuthondeka gicigo kia kugia ndumaniriri na gutwarithia nambere micemanio ita njira ya kugaciria umenyo wigii ugendi gicigori giki.
Mivango ino ni makinyo ma vata ma gucangira ugaruruku wa Embu na gutuika gicigo kia kwendeka ni aria mendete maria maturigicirie, aria mendete gwikenia na nyamu cia kithaka.
Kaari wa Mugendi
Mbica irutitwe online
