Ndereti ya kuruta munini wa rais, Rigathi Gachagua oviciri niicangirite miario micacu mwena wa Western Kenya guku atongoria makivingana iguru ria nuu ugaikarira giti gia Gachagua angirutwa oviciri.
Gikundi kia abunge a mwena ucio nikiambitie kuvurira minista Munene wa igina Musalia Mudavadi deve ya kuthurwa ari munini wa rais, Gachagua angiinukua.
Mumbunge wa Khwisero Christopher Aseka na mubunge wa Matungu Peter Nabulindo nimatongoretie gikundi kiria kiragucungira urutwa wa Gachagua oviciri guku makiendekithia Mudavadi oce giti kiu.
Airi aya muthenya wa jumamosi nimatariritie Mudavadi ta itua riria riega viu na ritangicungira guoya ndari ya Akenya.
Guku Mr Aseka akiongerera akiuga nigukorwa Mudavadi nike wikaririte giti gia kathatu kia vinya thirikariri niagiririte ambatue kuri giti gia kairi kia vinya Gachagua angigwa.
Riendekithia riao rirongerera urito wa meciria kwi Ruto wigie nuu ukathurwa ari munini wake, guku murima Kenya wina andu mugwanja urendekithia. Aya ni; minista wa maundu ma ndari ya vururi Kithure Kindiki, gavana wa Kirinyaga Anne Waiguru, mumbunge wa Kiharu Ndindi Nyoro, minista wa migunda Alice Wahome, Gavana wa Murang’a Irungu Kang’ata, mutongoria wa aria engi mbungeri Kimani Ichung’wa na mubunge wa Laikipia East Mwangi Kiunjuri.
Mbica irutitwo online
–Perpetual Mwende-
