Mwikuirwa wa uragani na uria wanyitirwe ari wa mwico agikuruvanua na uragani wa murugamiriri munene wa wandikani thiini wa kambuni ya Fargo, Willis Ayieko niakorwa akirigirirua gituori kia vorithi vanduri va mithenya 30.
Charles Otieno Odhiambo uria ni mwanake wa miaka 21 akinyirue mbere ya mucirithania wa igoti ria Siaya, Margaret Wambani uria wathanite akorwe akirigirirua mithenya 30 niguo kurikiriria uthuthuria.
Odhiambo uria ni mutwarithia wa vikiviki aikirue ngono ni maavitha a vorithi mwena wa Kisumu vuva wa gukuruvanua na ekuirwa aria maretikua gukorwa matavanirie uragani ucio.
Mwena wa nthitango ugitongorua ni Evans Soita, niguo uririe mucirithania gwitikira mwikuirwa athii na mbere kurigirirua niguo marikiririe uthuthuria.
Mucirithania Wambani niwitikirite ivoya riu na kwathana mwikuirwa uria nike wa gatano thiini wa ciira ucio akorwe akirigirirua gituori kia vorithi kia Railway mwena wa Kisumu.
Mucirithania niwathanire mwikuirwa athii ekirwe ithimi cia meciria guku akiatha mavithaa a vorithi makorwe magiika uthuthuria kuri thimu ciake igiri.
Mutigairi Ayieko arivotirwe gukorwa aurite tariki 18 mweri wa ikumi na agikorwa akuite mithenya itano vuvari runjiri muvakari wa kaunti cia Siaya na Vihiga.
Munene Nyaga
Mbica irutitwe online
