Kanitha gatoreki niithundurite kambeni ya mwaka uyu wa Jubilee ya gukanja mathiri iina itanya ria kurekera andu mathiri na kugia na mogaruruku ma kimbeca gitaruri kia Africa. Kambeni ino na iria itongoretwe ni AMECEA, the Jesuit Justice and Ecology Network Africa (JENA), Caritas Africa, and SECAM, niyendekithitie gukanjwa kwa mathiri maria kuringana naao matagiririkite na magiriritie gukura kwa utonga wa gitaru kia Africa.
Akiaria vindi ya uthunduri uyu muciiri wa Nairobi, mwenegiti wa AMECEA, muthikavu Charles Sampa Kasonde niukaniriritie muvango uyu niuramatite kiria Vava Mutheru Francis ekiririte mwakari uyu wa Jubilee, varia iramatite kivoto niundu wa gukura kwa utonga na kugitira nduriri iria ivinyiririkite.
Muthikavu Kasonde niuvecanite mukana wa mathiri ma nja ya gitaru kia Africa na maria makirite dollar trilioni 1, na mavururi mamwe magitumira makiria ma gicunji kia 50 vari igana ya mbeca iria maraugania kuriva mathiri guku magitiga nini cia kuramata ugima wa mwiri, kithomo na uthii wanambere.
Murugamiri munene wa Jesuit Justice Network Africa vatiri Charles Chilufya akinyita mbaru miario ino ya muthiakvu na kuuga thiri ti thina tu wigii utonga wa vururi nwati niukuruvanitie mitugo na gucungiria mamilioni ma andu gukorwa mari athini.
Kambeni ino iina muoroto wa gucaria kunyitwa mbaru ni nthi mugima niguo kugia na mitaratara mikinyaniru ya kuramata mathina ma kimbeca, ukovi wiina wigiririki na mivango iria gukinyirika ya kurumbuiyia gukura kwa utonga.
Uthunduri uyu ukite vuva ya umithio uria wonekanire kumana na kambeni ya mwaka wa 2000, varia thiri wa dollar birioni 100 watecanirue niundu wa mavururi maria mari na thiri ta Uganda na Mozambique na kumavotithia kugia na wigithia wa vata thiini wa nvonge cia mwingi. Kanitha gatoreki na anyiti itemi nimarauria thirikari, atongoria a kimavururi na aruti wira kunyitanira na gutigirira kwiina kivoto kia gukura kwa utonga niundu wa gitaru kia Africa.
Kaari wa Mugendi
Mbica irutitwe online
