Maabithaa a utwiria kuuma kaunty ya Kirinyaga nimabetwo rutha rwa kuthii na mbere na kubingira ekuirwo 11 a uici wa mabiu cecenini ya borithi ya Kerugoya kwa ibinda ria mithenya 7 niguo kurikiriria uthuthuria.
Mwena wa thitango uritie kabinda makiria undu uria mucirithania munene igotini ria Kerugoya Martha Mutuku etikiritie.
Ekuirwo acio maikirio ngono ni maabitha a utwiria muthiani wa kiumia thutha wa kuongerereka gwa ciiko cia uici wa mabiu na uria utwikite ta undu wa mutugo kaunties cia Kirinyaga, Embu, Nyeri, na Murang’a.
Ekuirwo acio aria nio Patrick Wanjohi Njoki, Peter Muriithi Ngari, Lukes Ochieng Olao, Simon Karagu Murigi, Anthony Mutugi, Daniel Kinyua Wangari, Samuel Gitonga Miano na Cecilia Wanja Njogu marakorereirwo kumbaco bindi ya mungururio mwena wa tauni cia Mwea na Kagio.
Muthenya oro ucio maabithaa acio nimaraikirie ngono ekuirwo angi ana aria nio John Macharia Karani, Martin Mwangi Gatimu, na Charles Kariuki Njeru na aria metikirire gukorwo matabanitie mibang’o ya uici wa ng’ombe, makimithinja na gucoka gutwara nyama cia cio guciethera thoko kaunty ya Embu.
Riu ekuirwo acio matanyitwo gugakinyio igotini tariki 28 mweri uyu wa kenda.
Mbica irutitwo online
–Muriithi Amos-
