Mutumia wa ukuru wa miaka 45 kuma iturari ria Kigari mwena wa embu yeguru ni urenda kivoto kia nevenya vuva kiria arerikana gukorwa atharikirwe ni andu arume athatu aria manyitithanitue na mutwarithia umwe wa boda boda na uria mutumia uyu aregete kugia ndugu ya wendo nake.
Janet Wawira uria nike watharikirwe acokete kuvuthira wheelchair gwa kavinda ka ciumia ithatu guku akithie nambere kuvoria nguraro iria agire vindi ya kutharikirwa.
Janet kavidari gaka akomete thivitariri wa Embu level 5 kuria augite undu uyu weyumirie riria arivire mutwarithia bodaboda niguo gukorwa akimukinyia mucii kuma thokori ya kibugu varia ivenya ria kuthie mwena wa kigari mutwarithia uyu wa boda boda acenjirie njira na kuthie ya kiangoci kuria arugamire nja gwake.
Augite mundu murume uyu ni wamwirire angiathiire nambere na thavari wakorwa ni ugwitikira kurara nake utuku ucio na riria aregire akigeria kuthie ni wacemanirie na andu arume athatu aria mamutharikire na kumutiga atekuvota kuthie.
Arerikana gukorwa ararire nja nginya riria muvituki umwe amwonire kiroko na kumenyithia family…Wawira riu niuretigira ugitiri wake guku akiuga mwikuirwa nwa akorwe akimurongoreria ringi kumana na gukorwa atakuvota kuthie na nginya mavinda maria akoragwa ari wenga.
Mbica irutitwo online
–Murugi wa Gitonga-
