Raisi wa tene wa vururi wa Kenya Uhuru Kenyatta niunyitite ugeni wigucano wa thayu wa Washington accord gatagati ka vururi wa Rwanda na D.R.C., guku agitariria gukorwa ari ikinyo ria vata riria rikuvingura ivinda riceru ria kunyitanira thiini wa uthiei wa na mbere.
Kenyatta arari umwe wa atongoria aria meyonere wigucano uyu wa vata ugicainwa ni raisi Paul Kagame na Felix Tshisekedi na Raisi wa Amerika Donald J Trump mwena wa Washington.
Agikarivithia wigucano uyu, niaugite Washington accord ni ukorwa ugiaka miaka ya kwirutira thiini wa uiguano wa gitaru kia Afrika ari vamwe na njira cia thayu gatagati ka Nairobi na Luanda iria atethererie gukinyaniria.
Wavo ni ukathiriritie raisi Kagame na Tshisekedi niundu wa utongoria wao na kwirutira gwoca njira njeru ya miario,ya kuthondeka wibokani wa mabururi na kunyitanira.
Waringi ni utamburite wira wa raisi Donald Trump na Amerika thiini wa kunyita mbaru muvango wa thayu na kuthondeka vandu va gukinyaniria undu uyu.
Kunari uguo niaugite wigucano uyu niukuvecana mwivoko kuri mamilioni ma andu aria mavutitue ni mbara na kuthondeka mweke wa mbere wa icigo iria nene gucaria thayu,ugitiri na nginya ucenjia wa utonga.
Mbica irutitwo online
–Murugi wa Gitonga-
