Ngavana wa kaunti ya Meru Kawira Mwangaza niwitite mucemanio senata wa kaunti ino na ambunge onthe a mbunge ya kivururi kuma Meru na maMCA niguo kwaririria ngucanio iria ithiite nambere gatagatiri gake na mbunge ya kaunti ino.
Mwangaza thiini wa marua iria arandikire igoro Njumatatu, etite senata Kathuri Murungi, ambunge onthe matongoretue ni mwenegiti wao ndagitari Mutunga Kanyuithia, maMCA vamwe na spika wao Ayub Bundi mucemaniori muthenya wa Aramici tariki ithatu mweri uyu wa ikumi na imwe.
Ngavana Mwangaza augite mucemanio uyu wa Aramici uvangitwe ni atongoria engi ta kanju ya mangavana itongoretue ni mwenegiti wao, ngavana wa Kirinyaga Ann Waiguru, niundu wa wagiririku wa andu a Meru.
Ndeto ino yukite wariria maMCA marakoretwe makiuga marenda ambunge a Meru makorwe mucemaniori uyu na ngavana Mwangaza avoe urekero kuri mwingi niundu wa kuga maMCA mendaga kuvakwa niguo mavitukie aria mendekithitue gutwika maminista a kaunti ya Meru.
-Mbuya Ngari-
Mbica irutitwe online
