Vatiri Samwel Clement Ngari Kibariki wa Diocese ya Embu na uria wakwire muthiari wa kiumia kithiru niuvurukitue. Fr. Kibariki avurukitue kivarori gia kanitha ya athure Peter na Paulo Cathedral mwena wa Karurina, Embu kuria mavatiri mavurukagua.
Igongona ria mathiko rirekinyitwe ni magana ma andu, mavatiri na athikavu aria ni vamwe na His Eminence John Cardinal Njue (Murwang’ína), Muthikavu muritau Peter Kairu (Nyeri), muthikavu Joseph Mbatia (Nyahururu), muthikavu Salesius Mugambi (Meru) na muthikavu Paul Kariuki wa Embu.
Thiini wa igongona riu ria mathiko, gutirari na miario mingi kwona ati riari riendekithia ria Fr. Kibariki gutigakorwe na miario mingi na ndakagurirwe maua maria maigagirirwa mbirirari.
Thiini wa mavunjio make, muthikavu Kariuki augite vatiri Kibariki endekithitie mbeca iria ingitumirwa kumugurira maua ma mbirira, itumirwe gutethereria andu aria athini.
Mitha cia kiririkano kia vatiri uyu ciekikire Jumatano kanithari ya mucii kwao ya Kiini, Kairuri Parish na kanithari ya miceni-Kyeni kuria arutire wira kavinda karaca. Fr. Kibariki arakuire ari na ukuru wa miaka 84 kumana na ndwari ya kavinda karaca. Aravuruka Wega, Nigutuike guo.
-Muriithi Triple M
