Vava Mutheru Francis niuthurite vatiri Very Reverend John Kiplimo Lelei aita muthikavu mutethereria wa diocese gatoreki ya Eldoret.
Ndeto ino icavithirue ngathetiri ya L’Osservatore Romano kuria Rome thaa thita na inyanya cia guku Kenya.
Muthikavu munene na uria ni murugamiriri wa Vava mutheru mavururi ma Kenya na South Sudan Bert van Megen, amenyithanirie ndeto ino kuvitukira kiama kia athikavu a kanitha gatoreki.
Mbere ya kuthurwa gwake, Vatiri Kiplimo atungataga aita murungamiriri wa St George’s Chaplaincy na vatiri mutethereria wa muthikavu diocesiri ino gatoreki ya Eldoret, ino ni vuva yake kuthurwa ni muthikavu Dominic Kimengich tariki 28 mweri wa kanana mwaka wa 2023.
Muthikavu muthure John Kiplimo aciarirue mwaka wa 1958 kuria Soy, kaunti ya Uasin Gishu. Athomere Philosophical studies kuria St. Augustine Seminary, Mabanga, kuuma mwaka wa 1979 nginyagia 1981, agicoka kuthomera mathomo ma Theological kuria St. Thomas Aquinas Major Seminary, Lang’ata, kuuma mwaka wa 1981 nginyagia 1985. Akunurirwe aita vatiri mwaka wa 1985.
Vuva ya gukunurwa gwake, niwatungatire thiini wa miceni iria iri diocesiri gatoreki ya Eldoret vanduri va miaka 12 mbere ya kuthii Vienna, vururiri wa Austria, mwaka wa 1997 niundu wa kuongerera kithomo. Ekarire Vienna miaka itandatu agika Masters na Doctoral studies thiini wa Liturgical Theology.
Arikia gucoka guku vururiri, niwathurirwe aita Rector wa St. Thomas Aquinas Seminary (STAS), Langata muciiri wa Nairobi mweri wa gatano mwaka wa 2017, giturwa anyitirire vanduri va miaka itandatu.
Kaari Mugendi
Mbica irutitwe online
