Mbunge ya kivururi niyongererete kavinda ga utungata kuri karani Michael Sialai na mwaka umwe. Komiconi ya uvecani motungata ya mbunge icemanirie na gwitikaniria kuongerera kavinda gaka varia Sialai agakinyia miaka ya gutiga wira mweri muku.
Kavinda ga utungata ga Sialai karatanyitue gukinya muthia tariki 25 mweriri nwati riu icukumitie nginyagia mweri wa mugwanja mwaka muku. Na njira nguvi ni kuuga mutaratara wa gucarania na karani muceru wa mbunge ino ukambiriria mweri wakairi mwaka muku.
Thiini wa marua yaao kuri Parliamentary Joint Services, mwandiki wa PSC Jeremiah Nyegenye augite makathura Sialai kuthii nambere na gutungata na njira ya kandarathi akinyia kavinda ga gutiga wira.
Nyegenye ongererete na kuuga kuongererwa gwa kavinda gaka gugatethereria utiganiri wa ovici wagigirite kuringana na mendekithia ma mogaruruku ma katiba.
Sialai athurirue guoca giturwa giki gia karani mbungeri ya kivururi mweri wa January mwaka wa 2017 agioca mweke uyu kuuma kuri mutigairi Justin Bundi.
Sialai niwacangire vanene gucaria kivonia vuva ya kithigithigi kia kithurano kia urais mwaka wa 2017 varia ambunge a NASA magomerete ciikaro cia mbunge ino na akiaraniria naao varia macokererie thiini wa ciikaro ino na mitaratara ikithii nambere wega mbungeri ino ya kivururi.
Kaari wa Mugendi
Mbica irutitue online
